飛簷走壁戰刀客Laughing急需法拉慰夫

謝天華打正旗號擔正演出電影《 Laughing Gor之變節》，為了不負眾望，他實行搵命博，戲中他要大展身手，飛簷走壁，大戰社團刀客，首日開工即拍到他眼坦坦，為此他要抽空跑步練氣。 Laughing嫂一角則決定由陳法拉飾演，天華大讚選角恰當

謝天華憑演 Laughing哥跑出後，往後星途有排跑，近日忙於拍攝新片《 Laughing Gor之變節》的他，為了以最 fit狀態示人，幾忙也抽空操一操。前晚約 10時他戴着耳筒，穿運動衫、短褲及波鞋，獨自在寓所附近的跑馬地馬場跑步，問天華是否操 fit拍戲？一身大汗的他氣喘如牛，揮手示意唞唞後，停一會才說：「係呀，我跑咗 5,000米呀，我有跑開步㗎。」


謝天華發揮 Laughing哥身手，飛簷走壁，拍到想叫白車。


謝天華親身上陣大戰社團刀客，難怪他大叫辛苦。

開工打到飛起

謝天華為 keep fit在夜晚跑步練氣。

新片於上周開鏡，天華首日開工雖獲無綫高層樂易玲探班，不過當天他全日打到飛起，處身舊樓簷篷上大打連場，以牛仔布包手大戰社團刀客，又要像馬騮般跳上跳落飛簷走壁。不過 Laughing哥除了打餐飽之外，無綫也待他不薄，為他精心選 Laughing嫂角色，最後由陳法拉擔演，擊敗應屆華姐冠軍、有「翻版林熙蕾」之稱的苟芸慧。另外，飾演江湖大佬的吳鎮宇，其獨特大佬造型曝光，頭梳道士髻，腰間掛上特製飾物，甚具古裝感。

「差啲要叫白車」

吳鎮宇的江湖大佬造型，頭紮道士髻夠酷。

昨日謝天華在電話中說：「第一日開工就想死，由朝早 11點打到夜晚 6點，我差啲要叫白車嚟，因為我唔用替身親自上陣，今次錢嘉樂係部戲嘅動作指導，佢問過我使唔使用替身，我睇過啲動作我可以應付得到，而且咁樣導演好做啲，唔使因為用替身而要鏡頭避，不過就真係好辛苦囉。」天華自言若動作太危險，也會考慮用替身，因他擔心受傷影響拍攝進度。對於落實由陳法拉飾演 Laughing嫂，天華說：「係呀，佢做好呀，外形又唔錯，又有觀眾緣，我唔知有冇親熱戲，費事一陣又話我自己加戲呀。」


索女陳法拉勝在有演出經驗，故贏得 Laughing嫂一角。